Despois de tanta campaña, tanto pacto e tanta crispación, non nos virá nada mal un (saque de) curruncho deportivo, así que benvida ós dous e sortiña.

Ó igual que os outros blogs podedes acceder dende a portada de Xeración Web, dende a sección de blogs/opinión ou directamente tecleando no navegador padiolamecanica.xeracion.com.

Benvida ós dous e sortiña.

Así que nesas estamos. Sen a nosa reporteira máis jlamourosa que se nos vai de enviada ‘espacial’ ata o día de reflexión. Menos mal que dende alí nos envía crónicas e fotos do maior epicentro cultural a este lado do Telón de Grelos (e parte do outro tamén) que é o Festival de curtas de Cans.. Polo menos, poderemos descansar un pouco de tanta sobredose electoral.

Algunhas novidades témolas xa na cabeza; outras moitas agardan no “limbo das aventuras gráficas” a que as rescatedes. Non sexades malos, se atopades algunha, axudádelle a atopar o camiño…

A partir de hoxe, este blog convírtese en “Éche o que hai”, a fiestra dende a que iremos contando o día a día da redacción, as nosas inquedanzas e as nosas propostas.

Así que aquí estamos, por fin, e aquí agardamos que vos guste estar.

Non nos gustaría ser alleos a este interesante fenómeno que está a provocar un gran cambio nas bases do xornalismo. Por iso queremos artellar en Xeración Web varias vías de participación que vaian máis alá de reservar algúns espazos para os usuarios. Ou sexa, ir un chisco máis alá dunhas simples “Cartas ó director 2.0″. Algunhas destas canles estarán de inicio e outras iranse incorporando a medida que avance a “fase beta” e nos vaiamos coñecendo mellor.

Hoxe gustaríanos falarvos dunha delas, Esfera libre, unha área aberta á participación cidadá, elaborada exclusivamente cos contidos enviados pola comunidade.

Se formas parte dun colectivo ou organización podes dar conta da vosa actividade ou dos problemas cos que vos atopades. Iso si, non se publicarán comunicados nin convocatorias de prensa.

Esfera libre terá un espazo propio dentro do xornal, pero os contidos non quedarán recluídos aí, senón que “inundarán” o resto das seccións segundo a súa temática e interese.

¿Publicarase en Esfera libre todo o que se envíe?
Non, Esfera libre non é un nin un simple foro ou un taboleiro, senón a sección dun medio de comunicación que debe cumprir cuns estándares informativos. A redacción revisará os contidos enviados antes de publicalos, do mesmo xeito que se establecen filtros e verificacións para todo aquilo que elaboraremos nós.

No caso de non publicación comprometémonos a explicarlle ó autor os motivos por escrito e a buscar unha solución.

Xa me sei o conto. Ides de ‘progres’, pero seguro que aplicades censura a todo aquilo que non vos guste…
A forza do xornalismo cidadán é a pluralidade de temas e enfoques, e que a comunidade chegue onde os xornalistas non somos capaces. Tirariamos pedras sobre o noso tellado se excluiramos temas só por non comungar con eles.

Para colaborar en Esfera libre só pedimos dúas cousas: honestidade e respecto, exactamente o mesmo que nos imos esixir os redactores no día a día. Como medio de comunicación, entenderás que temos unha responsabilidade sobre os temas que se publican. Todos podemos equivocarnos á hora de manexar datos e informacións, pero o que non podemos permitir é que Esfera libre se convirta nunha tribuna para insultos ou acusacións sen proba. Ese é o tipo de contido que non terá cabida de ningunha maneira.

Agora ben, se todos actuamos con sentidiño, non haberá ningún problema, ¿non?

Pode darse a posibilidade de que algúns temas susciten dúbidas a nivel informativo ou legal, pero como dixemos antes comprometémonos a discutilo sempre co autor e a buscar unha solución.

¿Haberá algún tipo de retribución por participar en Esfera libre?
Do mesmo xeito que comezan a facer varios proxectos da web 2.0, gustaríanos poder compartir os ingresos xerados coa comunidade. Claro que nunha fase inicial pouco se pode repartir, así que teremos que limitarnos a algún sorteo e a entregarvos a nosa eterna gratitude.

¿Como facer chegar algún contido?
Preferiblemente por correo electrónico en forma de arquivo adxunto adxunto á esferalibre@xeracion.com ou a xeracionweb@gmail.com.

Tamén podes envialo en soporte óptico (CD, DVD..) á Rúa Salvadas, 27, C.P. 15705, Santiago.

Calquera soporte é válido, texto, fotográfico, sonoro, videográfico ou multimedia. Iso si, ten en conta que a optimización en canto a peso e extensión é un valor engadido nos contidos web.

Así que xa sabedes, animádevos a participar

¿Que é Xeración Web? Basicamente, un novo xornal dixital, pero tempo teremos de irnos coñecendo mellor. De momento só queremos saudar e presentarnos.

Tomaremos prestada esta casiña uns días ata que nos mudemos á definitiva, moito máis grande e un chisco máis luxosa. Esta bitácora quedará como a nosa habitación, dende a que iremos contando o día a día da redacción.

Temos moita sorte. Tocounos vivir un gran momento para a comunicación onde todos, medios e usuarios, debemos redefinir o papel que nos toca representar neste novo ecosistema informativo. Para os xornalistas, a Rede supón un desafío extremadamente complexo, pero tamén unha grande oportunidade para experimentar novos camiños e modelos máis abertos e activos. E iso é o que dende aquí queremos probar.

Non imos facer grandilocuentes declaracións de intencións. Nesta redacción a idade media anda polos vinte e poucos, así que comezamos este camiño coa ilusión e humildade de quen sabe que quedan moitas novatadas por pagar.

De seguro que coa vosa axuda todo será moito máis fácil. Gústanos a rede, gústanos o xornalismo e cremos con toda sinceridade e honestidade que xuntos podemos facer un bo traballo.